كحك العيد الطريقة الاصليه
🍩🍩 كحك العيد 🍩🍩
للكحك اكتر من وصفة وكلهم احلي من بعض وكل وصفه ليها طريقتها المميزه ونكهتها .
في المقال دا هنتكلم عن الكحك بطريقة زمان ،طريقة الجدات الجمال بريحة الكحك والمحلب اللي بتبقا قالبه مش البيت بس لا الشارع كله .
المكونات :
١ كيلو دقيق خاص بالحلويات
٥٠٠ جم سمنه اي نوع بتحبيه
١ معلقه كبيره سكر حبيبات
١ معلقة كبيرة ريحة كحك
١ معلقة كبيرة محلب مطحون ناعم
١ معلقة كبيرة سمسم
¼ معلقه ملح
٢٠٠ مل لبن حليب او ماء
½ معلقه صغيرة خميره فوريه
٢ معلقه كبيرة ماء بارد حسب الحاجه
١ معلقه صغيره روح موز اختياري
١ معلقة صغيرة فانيليا اختياري
الحشو :
ملبن
½ ك ملبن
٢ معلقة كبيرة سمسم
١ معلقة كبيرة سمنه
١ معلقة صغيرة روح موز
كحك بالفستق
¼ ك ملبن
¼ ك فستق مطحون او مجروش
ملحوظات مهمه
♡ دي مكونات ثابته للكحك لكل طرق تحضيره مع اختلافات بسيطه .
♡ الطريقه دي بتطلع كحك مظبوط ، اذا حابين الكحك ناعم ودايب اكتر ،هنزود ١٠٠ جم زبده مضروبه او معلقه كبيره سمنه بلدي ، لو هنضيف نضفها مع اللبن مش مع عيار السمنه نفسه .
♡ ممكن نضيف بيكنج بودر للكحك مقدار معلقه صغيرة لكل كيلو ،فايدته ايه بيخليها هشه اكتر وفيها توريقة الكحك الجاهز.
♡ دقيق الكحك دقيق حلويات يعني مفيهوش عرق ع شان ميطردش السمنه ويبقا ناشف ناخد بالنا ضروري .
♡ ناخد بالنا من معيار الخميرة ع شان ميخمرش زياده فتضيع شكل نقشته وتتغير ريحته .
♡ الكحك بيتعجن بلبن حليب او ميه او الاتنين لكن مش بنضيف اي حاجه تانيه مثلا زي الزبادي ع شان يحافظ ع القرمشه وشكل الكحك المميز .
♡ ناخد بالنا منزودش سمسم لو هنستخدم منقاش عادي ع شان العجينه متقطعش في المنقاش .
♡ هنقطع حجم الكحك القطعه الواحده ١٨:٢٠ جم مش اكتر .
♡ مش بيتساب يخمر اول ماالعجينه تبقا جاهزه ونسيبها ترتاح هنشتغل علطول تقطيع ونقش وخبز ،لاننا مستخدمين خميره فوريه.
♡ كيلو الدقيق بياخد حوالي ½ كيلو ملبن او اقل شويه او اكتر شويه زي ماتحبي بس تاخدي بالك ع شان الكحك ميفتحش معاكي ويخرج منه الحشو .
طريقة التحضير
الطريقة الاصليه :
هنسيح السمنه ونسيبها لحد ماتقدح وهنتاكد بعود خشب خله .
ناخد بالنا طبعا كويس ونشتغل بعيد عن الاطفال.
في حله المونيوم او بوله ازاز هننخل الدقيق ونضيف عليه الملح والسمسم والمحلب وريحة الكحك ،يفضل طبعا ننخلهم كمان.
في كوباية اللبن هندوب السكر والخميره ونسيبهم ع جنب .
هناخد السمنه المقدوحه وهي سخنه جدا وننزل بيها علي خليط الدقيق وبمعلقه هنفرك السمنه والدقيق وخدي بالك سخنه جدا .
هنفضل نقلب في السمنه والدقيق لحد مانتاكد ان الدقيق كله اتشرب السمنه .
خدي بالك دي اهم خطوه في عمايل الكحك اسمها بس الدقيق يعني خلط السمنه والدقيق وفركهم مع بعض .
ع الاقل عشر دقايق كدا.
هنضيف اللبن والخميره والسكر والبيكنج بودر .
لو هنزود الزبده هنحطها دلوقتي.
هنعجن كويس لحد ماتلم خالص وتبقا متماسكه وناعمه في نفس الوقت .
هنجرب ننقش حتة عجينه لو النقشه حلوه ومش تخينه ومش بتطلع في المنقاش يبقا تمام هنسيبها ترتاح نص ساعه مثلا ،
طيب لو العجينه بتطلع في المنقاش هنضيف معلقتين ماء بارد ونشربهم للعجينه وبردو هنسيبها ترتاح شويه.
هنقطع جزء جزء من العجينه وحجم القطعه تقريبا ٢٠ جم وهنحشيه بالملبن او نحطه ساده حسب الرغبة.
هنرصهم في الصاج ونحطهم في الفرن نار متوسطه ،اول مالونها يبقا وردى وقعرها احمر يبقا تمام كدا نخرجه من الفرن ونسيبه يبرد براحته وبعدين نرصه في علب التخزين او اطباق التقديم.
❤ وكل سنه وانتم طيبيين وبخير ❤
تعليقات
إرسال تعليق