البسبوسة
طريقة عمل البسبوسه
طريقة عمل البسبوسة بطريقة سهلة و طعم زي المحلات .
المكونات
٣٥٠ جم سميد خشن
٨٥ جم سمنه سايحه
١٠٠ مل لبن حليب
٥٠ جم عسل جلوكوز او عسل نحل
١٧٥ جم سكر
٣٠ جم جوزهند مبشور
المكونات بالكوب
٢¼ كوب سميد خشن
½ كوب سمنه سايحه
½ كوب لبن حليب
١ معلقة كبيرة عسل جلوكوز او عسل نحل
١ كوب سكر
٢ معلقة كبيرة جوزهند مبشور
للشربات
١ كوب سكر
١½ كوب ماء
١ معلقة كبيرة عسل نحل او عسل جلوكوز
١ معلقة كبيرة زبدة او سمنه بلدي .
الطريقة
يتم دعك او بس السميد وجوز الهند مع السمنه السايحه .
نفركهم كويس لحد مانتاكد ان كل حبيبات السميد اتغلفت بالسمنه، تعتبر دي اهم خطوه
ف كسرولة هنحط اللبن والسكر والعسل مع بعض ونقلبهم كويس بمعلقه ع شأن مندخلش هوا في الخليط ونتاكد ان السكر كله داب .
لو في صعوبه في تدويب السكر ممكن ندفيهم ع نار هاديه لحد مايدوب بس منطولش النار عليهم .
هنحط خليط اللبن علي السميد والسمنه ويادوب نخلطهم مع بعض ناخد بالنا مش هنعجن .
في صينية مقاس ٢٥ هنوزع الخليط بالراحه وممكن نهبد الصينيه علي الرخامه ع شأن تتساوي ،وممكن نمسح ايدينا بدهنه سمنه ونساويها بايدينا .
بتتسوي في فرن ١٨٠ ° لمدة نص ساعة تقريبا .
اول لما تبتدء الحواف او الجوانب تحمر نحضر الشربات بتاعها اول لما يغلي نضيفه عليها لما تطلع .
التزيين
ممكن قبل النضج نضيف مكسرات مجروشة او لوز مقشر او البندق .
ممكن من غير تزيين
وممكن برشة فستق علي وجهها بعد النضج
وتقدم مع القشطه او الايس كريم الفانيليا 😋🥰
ملحوظة مهمه جداااا
الشربات بيتحط سخن اول مانطلع البسبوسه من الفرن
ملحوظة كمان
هنغطي الصينية كويس جدا بورق ألومنيوم او اي طبق نفس مقاس الصينية مش اقل من ساعة ع شان تبقا طريه 😋
لما تبرد خالص نقطعها براحتنا مكعبات او قطع كبيره
وبالف هنا 💗🥰
تعليقات
إرسال تعليق